Qanqlion

Əsaslar

• İçində jelatinə bənzər maye olan qanqlion kistaları hər hansı bir oynaqda və ya vətər yatağı olan bir vətərdə, ən çox biləkdə və ovucda, həmçinin, məsələn, bazu, diz oynaqlarında və bazunun ikibaşlı əzələsinin distal vətərində meydana çıxa bilər. 
• Simptomsuz qanqlion punksiya və ya cərrahiyyə ilə müalicə oluna bilər. 

Diaqnoz

• Qanqlion oynağa və ya vətər yatağına bitişik jeleyə oxşar tərkibli kista şəkilli strukturdur.   
• Jelatinoz tərkibin miqdarı artdıqca qanqlion ağrılı ola bilər, lakin əksər hallarda simptomlar yüngüldür. Xüsusilə bükücü əzələ vətərinin yatağına bitişik olan kiçik qanqlion ağrılı ola bilər. 
• Ən çox hallarda qanqlion biləyin arxa səthində yerləşmişdir. Lakin bəzən qanqlion ovuc səthində də meydana çıxa bilər. Qanqlionlar distal ovucda və ayaqda bükücü vətərlərinin yataqlarında və ya istənilən oynaqda da rast gəlinə bilər.
• Adətən səthi qanqlion diaqnozu klinik mənzərə əsasında təyin edilə bilər və diaqnoz iynə aspirasiyasında jelatinoz möhtəviyyatla təsdiqlənir. Əgər aspirasiyada jelatinoz möhtəviyyat əldə edilmirsə diaqnozu təsdiqləmək və şiş ehtimalını inkar etmək üçün əlavə müayinələr tələb olunur.        
• Çətin hallarda (məsələn, iri oynaq üzərində qanqlion və ya vətər zədələnməsi şübhəsi) diaqnoz ultrasəs və ya MRT ilə təsdiq edilə bilər. 

Müalicə 

• Əgər qanqlion ağrı və ya digər narahatlığa səbəb olarsa müalicə gərəklidir. Bilək qanqlionlarının təxminən yarısı spontan aradan qalxır.
• Qanqlionu punksiya edərək aspirasiya ilə içini boşaltmaqla ağrının müvəqqəti yüngülləşməsi təmin edilə bilər.
• Depo formasında olan bir kortikosteroid preparatı (triamsinolon, metilprednizolon) qanqlion içərisinə inyeksiya edilə bilər. Lakin bu müalicənin effektivliyi barəsində heç bir sübut yoxdur. Alternativ üsul yerli keyləşdirici inyeksiya etdikdən sonra baş barmaqla möhkəm sıxmaqla qanqlionu əzməkdir.
  • Əgər simptomlu qanqlion residiv verirsə  aspirasiya və inyeksiya təkrarlana bilər.
  • Əgər təkrarlanan aspirasiyalar uğursuzdursa və qanqlion simptomlara səbəb olursa cərrahi yolla müalicə edilə bilər. Qanqlion cərrahiyyədən sonra tez-tez (10-30%) residiv verir.
    • Əl barmağının distal (distal falanqaarası oynaq) falanqasındakı qanqlionlar, yəni mukoz kistalar prosedurla əlaqəli yüksək infeksiya riskinə görə aspirasiya və ya punksiya edilməməlidir. İnfeksiya demək olar ki, həmişə distal falanqaarası oynağın irinli artritinə aparır. Distal falanqaarası oynaqda qanqlion əl cərrahiyyəsi üçün ixtisaslı bir müəssisədə cərrahi yolla müalicə edilə bilər.