Böyüklərdə kəskin orta otit

Əsas məqamlar

• Adətən səbəb yuxarı tənəffüs yollarının infeksiyası nəticəsində Yevstax borusunun obstruksiyasından ibarət olur.
• Orta qulaq infeksiyasının gedişi uzandığı halda, pasiyent nazofaringeal şişin istisna edilməsi üçün otorinolarinqoloqa yönləndirilməlidir.
• Barotravma (məs., dalğıclıq etdikdə)  seroz orta otitə gətirir ki, bu zaman orta qulaqda steril ifrazat təyin olunur.
• Udlağın şüa terapiyası Yevstax borusunda funksional pozğunluq və orta qulaq infeksiyaları üçün şərait yarada bilər. 

Simptomlar və klinik müayinənin nəticələri

• Qulaq ağrısı və qulağın tutulması hissi
• Təbil pərdəsi şəffaf deyil və ya bulanıqdır, adətən qırmızı rəngdədir (bax Uşaqlarda orta otit).
• Müvafiq ölçülü pnevmatik otoskop vasitəsilə müayinə zamanı təbil pərdəsinin hərəkətliliyi azalmışdır. Timpanometriya  diaqnostika üçün güvənli bir metoddur.

Terapiya

• Kəskin orta otit zamanı ən geniş rast gəlinən törədici bakteriyalar bunlardır: Streptococcus pneumoniae, Haemophilus influenzae və Moraxella catarrhalis. Nadir hallarda, qrup A streptokoklar da aşkar edilə bilər; bunlar neyrosensor eşitmə pozğunluğuna və daha ağır klinik mənzərəyə səbəb ola bilər.
  • Birinci sıra dərman preparatları olaraq amoksisillin (amoxicillin) 750 mq gündə iki dəfə və ya penisillin V (penicillin V) 1,5–2,0 milyon BV gündə iki dəfə, bir həftə ərzində tövsiyə edilir.
  • Alternativ dərman preparatlarına amoksisillin-klavulan turşusu (amoxicillin-clavulanic acid), trimetoprim-sulfametoksazol (trimethoprim-sulfamethoxazole), azitromisin (azithromycin), klaritromisin (clarithromycin) və ya ikinci-nəsil sefalosporinlər aiddir.
• Böyüklərdə kəskin orta otitin ağırlaşmaları nadir hallarda yaranır. Uzanmış gedişli və ya ağır orta otit zamanı, və ya bakterial əkmə üçün nümunə götürülməsinə ehtiyac olduqda (məs., immunçatışmazlığı olan pasiyentlər) timpanosentez göstərişdir.
• Barotravma nəticəsində yaranan seroz orta otit damardaraldıcı dərman preparatları və orta qulağın üfürülməsi vasitəsilə, ehtiyac olduqda isə timpanosentez ilə müalicə edilə bilər. Antibiotiklər yalnız ikincili infeksiyaya şübhə olduğu halda göstərişdir.
• Pasiyentin başgicəllənmə və ya qulaqda intensiv küydən şikayət etdiyi, ümumi vəziyyətinin pisləşdiyi, ağrının güclü olduğu və ya mastoiditə  şübhə yarandığı hallarda otorinolarinqoloqun konsultasiyasına ehtiyac var .

Müşahidə

• İnfeksiyadan sonra bir neçə həftə ərzində orta qulaqda mayenin olması mümkündür. Qulağın tutulması və eşitmə qabiliyyətinin azalması böyük yaşlı pasiyentləri çox rahatsız edə bilər. Qulağın tutulması orta qulağın ventilyasiyası hesabına azaldıla bilər (Valsalva manevri: burun-udlaqdakı təzyiq, burun dəlikləri və ağzı qapalı tutarkən güclü nəfəsvermə vasitəsilə artırıla bilər).
• Pasiyentin klinik vəziyyətini dəyərləndirmək, orta qulaq ventilyasiyası və eşitmənin yaxşılaşmasını təsdiq etmək məqsədilə kontrol yoxlanışı təxminən bir ay sonraya təyin olunmalıdır.