Hematopoetik və limfoid toxumaların şişləri: ümumi məlumat
EBM Klinik protokolları
25.04.2017 • Sonuncu dəyişiklik 25.04.2017
ErkkiElonen
Əsas məqamlar
Pasiyentin simptom və əlamətlərinə, məsələn, naməlum mənşəli qızdırma, infeksiyaya meylliyin artması, limfadenopatiya, hepatosplenomeqaliya, bir sıra hüceyrə xətləri üzrə sitopeniya, əhəmiyyətli dərəcədə sitoz, qanaxma və ya tromboza meyl daxil olduqda bədxassəli hematoloji pozğunluğun mümkünlüyü yadda saxlanılmalıdır.
Aqressiv limfomalar, kəskin leykemiyalar, ağırlaşmış mieloma və mieloproliferativ xəstəliklər kimi xəstəxanada təcili və ya təxirəsalınmaz müalicə tələb edən vəziyyətlər tanınmalıdır.
Əlamətlər və simptomlar
Heterogen xəstəlik qrupundan olan bədxassəli qan xəstəlikləri. Hematopoetik və limfoid toxumanın şişləri ümumilikdə təqribən 100 xəstəlik tipini əhatə edir.
Bu xəstəliklərdən bəzisi çox ləng inkişaf edir və onlar aylar və ya illər ərzində heç bir simptoma səbəb olmur və ya müalicə tələb etmir. Bu pasiyentlərdən bəzisinin heç zaman müalicəyə ehtiyacı olmayacaq.
Bununla birlikdə, bu xəstəliklərdən bəzisi çox aqressivdir və əhəmiyyətli dərəcədə lokal və ya sistemli simptomlara səbəb olaraq patoloji hüceyrələrin sayını bir neçə gün ərzində artırmağa qabildir. Çox zaman təxirəsalınmaz və ya hər bir halda təcili qaydada hospitalizasiya göstərişdir.